الحسناء ومدير السجن

عنوان القصة : الحسناء ومدير السجن

---------- الجزء  1 & 2 & 3 -------

ماما اني خارجة دعي معايا عفاك

سيري ابنتي الله يرضي عليك والله يوفقك 

انا حسنا 25 سنة اليوما اول يوم ليا فوظيفتي مراقبة في مكتب حقوق الانسان كنتمنى من الله يوفقني ويسرلي اموري 

مشيت للبيرو واستقبلاتني المديرة ووراتني البيرو ديالي والخدمة ديالي قاتلي اليوما غنستقبلو رجل كاوري واللي تعرض لاعتداء من قبل الجار ديالو واللي على حد قوله انه سلب الحق ديالو في انه يعيش بسلام فقط لانه نصراني 

بعدما دوزت اول نهار ليا فالخدمة واللي كانت بالنسبة ليا اجمل شيء وقع ليا فحياتي جيت نخرج من البيرو وانا نلمح واحد الشخص طويل وقلدة ولابس لباس رسمي وكيخلع الصراحة جا زدح باب مكتب المديرة وبقا كيهضر معاها بصوت عالي وكيقول ليها دخلي سوق راسك ولا مغيعجبك حال وغاتشوفي مني الوجه التاني ماجيت فين ندخل حتى خلعني بالخروج المفاجئ ديالو   خلاني مسمرة فبلاصتي شاف فيا واحد الشوفة حادة وخرج

دخلت عند المديرة لقيتها ساهية حدا السرجم وانا مافاهمة والو فهاد الروينة اللي واقعة

_مادام سامية شكون هاد السيد ولاش كيتصرف هاكا ؟

_والو ابنتي  مكاين والو دابا تولفي هاد الاشكال وهاد النوع اللي حنا بالنسبة ليهم غير شوكة فالحلق 

واخا مفهمت والو ولكن اضطريت نسد الموضوع ونودعها بلباقة ونوصيها ترد بالها على راسها ومشيت  الطريق كلها وانا كنفكر فداك الراجل وشكون هو واش بينو وبين مدام سامية

وصلت لدارنا دخلت كليت وصليت ودعيت الله يوفقني وانا داك الراجل المخيف مابغاش يحيد من بالي  الصباح فقت ونفس الشيء صليت وفطرت ومع الدعوات ديال ماما خرجت مشيت الخدمة ديالي وانا كللي نشاط وحيوية مللي وصلت تلقيت اسوء خبر لهاد اليوم 

قالولي الزملاء الديالي ان المديرة ديالنا تعرضت لحادثة سير البارح وانها دابا في المستشفى وحسب ما سمعت من شي بنات قالو باللي ضرباتها شي طوموبيل وصاحبها هرب وباقي ماشدوه لا مستحيل زعما واش ممكن القضية تكون مقصودة  لا مستحيلالراجل الراجل ديال البارح   واش نمشي نعلم البوليس  كان كيهددها بصريح العبارة وكيقولا بعدي مني ولا مغيعجبك حال  لا خاصني نمشي نطمئن على مدام سامية 

مشيت شديت طاكسي وصلت لسبيطار سولت على الغرفة اللي راها فيها ومشيت ليها مللي دخلت  الله يا ربي اش ها الحالة مهرسا ومجروحة ً

_مادام سامية لاباس عليك تخلعت عليك بزاف

_متشوفي باس ابنتي متخافيش عليا انا لاباس 

_بلا شك هو السبب فهادشي خاصنا نعلمو البوليس بيه

_حسنا  منبغيش نسمعك قولتي بوليس  انا غنعرف كيفاش غاناخد حقي منو ولكن بلاتي عليه حتى نبرا حسابو معايا انا 

-ولكن شكون هداك امدام 

-منير حازم مدير السجن ديال المدينة ديالنا 

-(بصدمة) مدير سجن؟

-كيما سمعتي  مشهود عليه بعدة خرقات من نهار تعين عندنا هنا وانا باغيالو شي فرصة اللي نشدو بيها كيعامل السجناء بحال العبيد ومتورط فقضايا الرشوة اضافة الى تعامله مع اهالي السجناء بقسوة  

-وعلاش معلمتيش بيه الادارة العليا للسجون وعلاش دارليك هادشي

-حيت بلغت بيه وكل مرة تجي لجنة تراقبو واخا مكاتلقا والو ولكن كيأرقوه وحاول يرشيني اكتر من مرة ولكن لا مستحيل نتخلا على المبادئ ديالي 

شديت ليها فيديها وقلت ليها : انا غانكون ديما فجنبك وكنواعدك غندير المستحيل باش نطيحو هاد الفاسد وياخد الجزاء ديالو

-عندي فبالي واحد الفكرة اللي نقدرو نطيحوه بيها ولكن منعرف واش غاتوافقي عليها 

-انا معاك امدام واخا نعرف ندفن راسي مغنتراجعش باش ما كان

-شوفي احسنا   اللي بحال منير هازين راسهم غا بمنصب ديالهم وكيطغاو ولكن غير يطيحو من المنصب ديالو ميبقا عندو ما يدير وكلشي اللي كانو كيعاونوه غايتخلاو عليه ومادمت انا كنواجهو راه غيبقا دايما يحضي راسو مني ومغنعرف منين نشدو 

-شنو المطلوب مني انا غانديرو

-غاتحاولي طيحيه وتوهميه باللي ممكن يشريك وتبقاي تجيبيلو الاخبار من عندي ونتي عارفة شنو مطلوب منك  تخليه يرتاح ليك حتى يطيح فشبكة

-موافقة 

-انا غنكمليك الخطة 

بعدما كملت من الزيارة ديال مدام سامية مشيت للدار وبقيت كنفكر فداكشي اللي قالتلي وكندعي من الله يخرج العقبة على خير وخصوصا هاد الشخص اللي غندير معاه هاد اللعب ماشي ساهل وكلشي كيديرلو الف حساب ذكي فحال الثعلب 

الغد ليه فقت وكللي عزم الفساد خاسنا نحاربوه بكل الطرق حتى لو استعملنا الاحتيال مشيت البيرو ديالي واتجهت نبدا الخطة ديالي  اتجهت صوب السجن المحلي اللي غنتلاقا فيه بعدوي وعدو الانسان, دخلت مرفوعة الراس وواثقة من نفسي وماباغا نبين اي خوف بعدما دللوني على مكتب المدير دخلت بعد ما استأذنت 

-السلام عليكم انا حسنا نائبة مدام سامية من مكتب الدفاع عن حقوق الانسان

رفع ليا راسو وحسيت بيه تفاجأ وحل فيا عينين وكيما قالت مدام سامية فوق هادشي كولو عينيه زايغة مد ليا يديه وسلم عليا 

-يا الف مرحبا بالزين تفضلي اش هاد النور دخل 

-معنديش بزاف دالوقت ميسو منير واش ممكن نبداو الجولة (دايرة ابتسامة مزيفة وانا غانموت بالخلعة )

-طبعا طبعا ومكرهتش نديرو شي قهيوة اونسومبل نتعرف فيه على هاد الوجه الحسن

-اكيد جايين ايام ونتعرفو فيهم مزيان

درنا الجولة بين الزنزانات كان كلشي عادي لحد ما سمعت صوت شي واحد من السجنات بحال الى كيعيط عليا بصوت خافت حاولت منبينش لسي منير لحد ما جات الفرصة المناسبة بحيث جاه اتصال واستغليت الفرصة مشيت عند السجين وقالي 

-واش نتي مساعدة ديال مدام سامية 

-هي انا 

-سمعي مزيان راه هو مغايديكش لداك الزنزانة اللي فاخر الكولوار حيت هداك قصر ماشي زنزانة

-مفهمتش

-تما واحد تاجر مخدرات معروف وكيضور مع السي منير بالملاين واخد راحتو فحال الى راه فدارهم وحنا حاكر علينا ولينا بحال العبيد اما مولاي مول الفلوس راه هازو فوق راسو 

-هادشي خطير فالسجن كلكم سواسية انا غنتصرف 

ماجيت فين نكمل الهضرة حتى لقيت سيهم منير واقفلي عند راسي 

-شركوني معاكم فالهضرة 

-ههه والو اسي منير غا كنسول السجين واش كياكلو مزيان واش كتعاملوهم مزيان باش نلقا ماندير فرابور 

-مزيان انا الى بغيتي نعطيك رابور من عندي واجد وبلا متعدبي راسك كاع 

-هاهاها احسن حاجة تكون درتيها سي منير ما فيا ميوجدو وغاتكون درتي فيا خير كبير

-يالله نشربو قهيوة فالمكتب ديالي ومنو نعطيك الرابور 

مشيت مع كحل العفطة وانا عازمة ننتاقم لكل بريىء ظلمو هاد المجرم خديت قهيوة وحتى الرابور وبينتلو باني ما عندي سوق فخدمته باش يرتاح من جهتي ويكمل شغالو ونجحت فداكشي

خرجت من عندو مشيت طايرة لعند مادام سامية اللي عاودتليها كلشي بالتفصيل وقاتلي مزيان ماللي مبينتيلو والو هادي فرصة باش نديرو رابور ونديرو فيه مابغينا نرسلوه لجهات عليا 

وفعلا داكشي اللي درت صاوبت رابور درت فيه جميع الخرقات اللي شفت ومن بينها صاحب صاحبنا البزناس وداكشي تم فسرية تامة صيفتو وانا كنستنا تجي لجنة تفاجئو وتمشي تكتاشف داكشي اللي كايدير 

فالصباح مشيت الخدمة وسمعت كيهضرو على السجن واللجنة اللي حلات بيه طبعا خاصني نعرف شنو غايكون ردة الفعل ديال اللسي منير مللي غيعرف باللي مقدرش يخدعني مشيت وعرفت اللجنة بنفسي وسط اندهاش السي منير من بعد متأكد اني قدمت تقرير اخر غير التقرير اللي خديتو منه 

اللجنة مشات مباشرة للامكنة اللي وريتها ليهم واكتشفو الخرقات كلها كيف لا ومنير ما دار بحساب حتى حاجة وكان قرارها اعفاءه من مهامه وتقديمه للمحكمة

فرحت بزاف حيت الراس ديال منير واخيرا طاح ولكن ديك النظرة ديالو عمري مننساها بحال الى كيتوعدني بانتقام شديد منكدب عليكم خوفني بزاف 

ولكن كنت كنقول انه ميقدر يدير والو خصوصا وانه مابقا عندو والو 

دزت عند مادام سامية اللي هنآتني بزاف وقاتلي درتي اللي مقدرتش انا نديرو برافو عليك فرحت بزاف ولكن الخوف مسيطر عليا وصارحت المديرة ديالي بهادشي اللي طمأناتني واقترحت عليا نرتاح شوية 

رجعت البيرو باش ناخد حوايجي وسمعت كلشي كيهضر على البنت اللي طيحت السي منير من منصبه وشي كيقول راه عندها معارف صحاح هما اللي جابولها العز وحد اخور كيقول راه هي هديك عندها معاه شي حساب وجات تنتاقم وكاين اللي كيقول برداتلينا غدايدنا فيه وكاين اللي كيقول راه مصيفطينها عديانو  كلشي هادشي ضرني فراسي بزاف حتى واحد مصفا نيتو وقال باللي دارت خدمتها بشرف وتبعات الحق ولقيت انه فعلا خاصني نرتاح كيما قالت مدام سامية

مشيت لدارنا نرتاح يوماين ولكن اليوماين دازت فالتفكير فهادشي اللي واقعلي الله يخرج العاقبة على خير وصاف

*من جهة اخرى*

-السي كريم ،مبروك عليك واخيرا خرج ليك الانتقال لمدينتك 

-الله يبارك فيك اسيدي ، هادا ما كنت كنسنتاه من شحال هادي 

-انا مايقن بانك غتقدر تسير الادارة ديال السجن تما بنفس الكفاءة ديال هنا كنتمنى ليك التوفيق

خرجت كنجري نتاصل بالوالدة نفرحها بهاد الخبر السعيد واخيرا غنعيش معاها وغانقابلها بنفسي وغنكون مرتاح من جيهتها 

-الو الواليدة راه خرج قرار الانتقال غدا غنكون معاك فالدار وعمري مغانفرقك 

-الله يا ولدي مسايعانيش الدنيا بالفرحة الله يرضي عليك اولدي 

مشيت وانا فرحان بغيت نودع زملاءي اللي كانو فرحانين ليا بزاف جلسنا ناشطين حتى دوا واحد من صحابي 

-كريم ، فخبارك غتاخد بلاصة من ؟

-لا شكون كان تما

-كتعرف منير حازم 

-اه واش هو وفاين انتقل

-هو منتقلش هو جراو عليه واللي جرات عليه ولية 

-مفهمتش كيفاش شرحلي 

-هادشي قالولي واحد من صحابي عاودولو منير ، قالك كان على علاقة بها وباغيها للزواج ولكن هي غدرت بيه ودارتلو فخ بعدما اتفقات مع شي واحد من اعداءه من هادوك التجار الكبار ديال المخدرات حيت مبغاش ينساق لاهواءهم حيت بغاو يردو السجن فندق لرجالهم اللي تما 

-ايوا

-ايوا تلوات عليه حتى طيحاته فحبها ومع هي زوينة وصغيرة ومعشاقة 

-وكيدارت حتى وصلت ليه وكيفاش حتى جراو عليه 

-هي خدامة فداك مكتب حقوق الانسان داكشي علاش سهل عليها دير داكشي اللي دارت 

-اه فهمت ، بنادم اللي خدام بالمعقول دغيا كيصفيوهالو هاد الفاسدين ايلا مامشاش على هواهم ودار داكشي اللي بغاو ، واختيارهم للمرأة كان حيت الراجل دغيا كيطيح فالشبكة وضعيف قدامها الله يبعد علينا شر النساء 

-هههههه امين اصاحبي عنداك غا تمشي تديرها بيك حتى نتا 

-هههههه ماتخافش عليا مازال متخلاقت بنت لمرا اللي ديرها بيا انا 

مشيت كنفكر وندعي الله يبعد عليا الفاسدين وكنتوعد لديك البنت الا طاحت قدامي غنوريها ايام كحلة  القانون غيطبق على الغني والفقير فالسجن وكلهم سواسية  قالك حقوق الانسان  اينا حقوق وهي كتخدم بهاد الاسلوب السافل الخدمة بنزاهة هي شعاري وغنموت من اجل هاد الوطن واعلاء كلمة الحق فيه وتطبيق القانون

الغد ليه سافرت لمدينتي وتلاقيت الواليدة ياه شحال توحشتها بست ليها راسها وعنقتها بزاف توحشت دارنا واخيرا غنستقر فيها بعدما ارتاحيت ورتبت حوايجي ودوزت نهار زوين مع الواليدة غدا غنستلم الخدمة ديالي فالمدينة وغنستقر هنا

فصباح دالغد ليه نضت وكلي حيوية ونشاط وانا كلي عزم واصرار نحارب الفساد ومنعطي فرصة لاي واحد اخترق القانون وغنكمل مسار منير فالنزاهة (اييه لوكان تعرف مدى نزاهة منير هههه)

مشيت الخدمة والكل داير حساب لهاد المدير الجديد اللي حتى واحد معارف شنو تحت راسو وشنو ممكن يدير وكان اول حاجة خطرت ببالي هي ندير زيارة لمكتب حقوق الانسان اللي فيه ديك خيتي اللي كلشي كنسمعو كيهضر عليها هي اللي طيحات براس منير بسهولة وفعلا مشيت استقبلوني بعدما عرفو اني المدير الجديد واول ،كان داز على سمعي ان صاحبتنا اسمها حسنا وفعلا سولت عليها وعرفت انها فاجازة طبعا غتكون فإجازة وهي دارتها قد راسها استأذنت ورجعت للمكتب ديالي فالسجن دوزت نهاري عادي فالخدمة

عند حسنا 

مازال مبغا يتحيدلي داك خينة من راسي مخيفاش منو ولكن خايفة على ماما وعلى شي واحد من احبابي هما معندهم حتى ذنب فهادشي اللي درت انا  التفكير غيفجرلي راسي خفت بزاف الله يا ربي اش دخلني فهادشي وانا كانت اقصى طموحاتي نخدم ونشرف ماما مع عائلتي وهي حياتها كاملة وقفا معايا ومحنا على ودي 

واخيرا مشيت لخدمتي واستقبلاتني مدام سامية بحب بعدما رجعت للخدمة وهي شبه متعافية حيت هي من النوع اللي كتحماق على خدمتها 

-تفضلي احسنا 

-ربي يخليك امدام 

-فخبارك الاخبار الجديدة راه تعين هنا مدير جديد للسجن فالمدينة 

-بالصح  على الله ميكونش بحال اللي قبلو 

-انا متفائلة منو هو شاب باين عليه ذو كفاءة وعلى حساب البحث اللي درت عليه فهو نزيه فالخدمة ديالو ومعقول وراه هو ولد المدينة واكيد غيبغي يحافظ على بلاصتو هنا 

-فرحتيني واخيرا شي حد كفؤ ونزيه ملينا من الفاسدين

-وبالمناسبة هو جا اليوما وسول عليك 

-(بصدمة)سول عليا انا؟

-متخافيش اكيد سمع بداكشي اللي درتي وجاه الفضول يعرف شكون هادي اللي عندها شجاعة تواجه الفساد 

-نتمنى 

-يالله دابا سيري بداي خدمتك وغتجي شي فرصة نتعرفو عليه فيها 

-واخا امدام نهارك مبروك

مشيت للبيرو ديالي والصراحة فرحت مللي سمعت داكشي من عند مدام سامية اكيد غيكون عارف هاد منير كيف داير  نمشي نشوفو نتعرف عليه ؟   لا مالو شكون هو نكبرلو الشان خليه يجي هو اوووف شكون هادا باش يشغلني كاع هاكا 

بقيت كنفكر وكندوز الوقت حتى وصل وقت الغدا ومشيت نتغدا فواحد الصناك قريب مشيت وماجيت فين ندخل حتى تساطحت مع شي حد طلعت راسي نشوف  ياه على طولة وعلى زين سرحت فيه وفوسامته وعضلاته حتى فيقني من الاحلام 

-واش نتي عمية  واش مكاتشوفيش قدامك

اش هاد الصوت اللي بحال الرعد فوداني خلعني ناري واش هاد الزين يجي مع هاد التكبر وهاد القصوحية مقديت ننطق حتى بكلمة وحدة داز من حدايا وخلاني مسمرة يالهوي يا لهوي يالاااااهوي خدا قلبي معاه ومشا واعباد الله واش هدا زين ولا ملاك ولا منين خرجلي كيحمق كيحمق دبت انا دبت نظرة وحدة من عينيه طيحاتني فهوااه  حسنا حسنا فيقي مالكي مالكي على هاد الحالة واش شفتي براد بيت ولا  لا لا لا هاد حسن منو  وافييقي الالة فيقي اوف ومتكبر من فوق  ولكن زوين زوين  اول مرة كنتزعط فشي واحد  وا الصراحة زوين وعاطي العين احح قلبي واييه احسنا وليتي زهوانية هههه 

تغديت ومشيت نكمل خدمتي وصورة الزين مبغاتش تحيد لي من بالي هداك اكيد شي ممتل ولا شي موديل ولا يكون شي حد فوزارة السياحة  ناري على زين  استغفر الله العظيم  مالي وليت هاكا فيقي  فيقي فيقي  سالينا

-حسنا  حسنا 

-زوين والله حتى زوين 

-وناري يا الزغبية شكون هادا اللي زوين 

-ا اب.م.م

-علاياش كاتمتمي مالكي

-مدام سامية  من امتا وانتي هنا 

-مللي بديتي كتقولي زوين قوليلي شكون هادا اللي زوين كرري 

-ا.لا لا غا واحد القفطان شفتو فصباحيات دوزيم ومكرهتش نشريه دا ليا عقلي 

-مممم قفطان ودرتي عليه هاد الحالة  واخا يا لالة تيقناك 

-ها كنتي باغا مني شي حاجة؟

-اه كنتي غادي تنسيني يالله خاصنا نمشيو نشوفو الاوضاع فالسجن ونعرفو واش داك المدير داير خدمتو نيشان ولا بحال غيرو 

-اووف انا والله ايلا داك الحبس كيجيبلي التشاؤم

-وعلاش يجيبلكً التشاؤوم ياك الويل وغبر منو ومابقاش تما  زيدي باركا من الفشوش  وزيدي تخدمي على راسك

مشينا انا ومدام سامية للسجن المحلي وانا الصراحة ما فيا مايدخل تما غا دخلنا واتجهنا لمكتب المدير دخلنا 

-نهارك مبروك السي كريم 

هز راسو وانا نتصدم للمرة الثانية واهيا ناري واهيا ناري هو والله حتى هو

-نهارك مبروك مدام سامية 

سلم على المدام ومد يدو يسلم عليا وانا بقيت مسمرة وحالة فمي فيه مقديت نتحرك وهي تنغزني مدام سامية باش نفيق من الصدمة 

-ا.ا.ا السلام انا حسنا المساعدة ديال مدام سامية 

مديت يدي وسلم عليا ودار فيا واحد النظرة اللي مفهمتهاش خلات فيا واحد الحيرة كبيرة

دازت ديك الدورة اللي درنا فالسجن وكأنها 50 سنة بقيت كنراقب فيه مقدرتش نحيد عيني منو خدا ليا قلبي ومغاديش ننكر مللي كملنا ودعنا السي كريم ومشينا رجعنا المقر ديالنا 

-كلشي هو هداك كيما قلت ليك احسناء هاد المدير الجديد كيما سمعت عليه تماما وماشي بحال اللي قبلو 

-(ساكتة)

-واش مخلياني كنهضر غا بوحدي الالة كنهضر معاك زعما 

-امم كتدوي معايا

-لا مع خيالك  كاين شي حد من غيرك معايا 

-شنو قلتي؟

-ماقلت والو ماعرفت مالك هاد الايام بنتي ليا ماشي هي هاديك 

من جهة اخرى عند كريم

-واخيرا شفت ديك الحية  داكشي اللي كيقولو عليها بالصح هي زوينة ومكاينش اللي ميعجبش بها وباينة فيها البراءة على وجهها ولكن معامن جيتي معامن جيتي انا نخليك تندمي على النهار اللي فكرتي فيه تلعبي معايا شي لعبة

-السي كريم سمحلي ولكن واحد السيد بغا يشوفك 

-شكون هادا

-هادا المدير القديم للسجن  اللي منير 

-اه قوليه يدخل دغيا 

دخل منير بابتسامة زائفة وسلم على كريم 

-مرحبا بيك السي منير تفضل جلس 

-ربي يخليك 

-مبدئيا كنتأسف على داكشي اللي وقع ليك عارف ولاد الحرام كتار صحابي عاودولي شنو وقع وكيفاش تلوات عليك ديك الافعى 

-ها نتا تشوف اخويا ومكاين اللي خرج علينا قد العيالات تيقت البراءة ديالها والتلوين ديالها عليا وباللي هي كتبغيني وفالاخر شوف اش دارت بيا وخرجت على حياتي وعلى خدمتي 

بقا منير كيحكي فالاكاذيب لكريم حتى تيق كلشي داكشي اللي قال 

-حضي راسك منها اخويا طبعا غنبغي ديرليك نفس الشيء 

-متخافش عليا انا غندمها على نهار اللي غادي تقرب فيه ليا 

مشا منير بحالو وهو فرحان بداكشي اللي دخل لراس كريم الهدف ديالو يوقع العداوة بيناتهم اول خططه للانتقام

اما كريم فبقا حاير فافكاره وكيفكر فحسناء كيفاش وحدة بحال هاديك تقدر تستعمل الجمال ديالها وبراءة وجهها ولكن الفلوس كتعمي النفوس

*

اه يا قلبي اش هادشي كيوقع ليا 

حسناء انا كنبغيه بزاف تقبلي تتزوجي بيا 

حتى انا كنبغيك ،موافقة نتزوج بيك ونعيش معاك حياتي كلها 

موافقة  موافقة 

الله يا بنتي مالك كتقفقي ،فيقي راه 10 دالصباح هادي ونتي مازالة مكسلة لي فالناموسية نوضي 

-هاه فيناهو كريم 

-شكون كريم اويلي 

-والو اماما  ناري قفرتها تعطلت على الخدمة اليوما يجريو عليا 

اويلي لاش فقت لاش  اوف غا حلمة يا كريم ومدرتي فيا حتى فالاحلام مفرقتي عليا 

مشيت ناشطة للخدمة واخا معطلة وعارفة راسي غنتصبن وغانتنشر من عند مديرتي العزيزة ولكن على الاقل حلمت حبيب القلب  اييه ولا حبيب القلب ماشية وكنغني  معجبة مغرمة انا باقا مش عايزة الا هو نظرته لمسته همسته بتحرك قلبي جوة الله الله على نانسي عجرم والجو زوين احياني على الحب كيفاش كيقلب الجو ههههه

دوزت نهاري وانا غادية جاية عند مدام سامية 

-مدام غنديرو شي دورة شرفية اليوما الحبس؟

-لا

-وعلاش ياك خاصنا نكونو حاضيين 

-شنو نحضيو عاد مشينا البارح ولقينا كلشي هو هداك ولا نتي باغا تشوفي شي حد تما

-لا.لا غا بغيت تكون خدمتنا هي هاديك 

-سيري ابنتي للبيرو ديالك سيري 

-هاهي غادية 

مشيت ورجعت عاود تاني 

-مدام نسينا ماخدينا تصاور راه مهمين للرابور شنو رأيك نمشي ناخدهم 

-سيري ابنتي للبيرو ديالك راه درنا التصاور البارح فين كان عقلك نتي الله اعلم سيري لعني الشيطان سيري 

مشيت وانا ماهازاني دنيا باغا غي نشوفو اعباد الله نشوفو وصل وقت الغدا قلت يمكن نشوفو فالصناك  صاوبت راسي مزيان وقاديت مشيت عييت منستنا والو داكشي اللي طلبت خسرت الفلوس فيه على والو مادازتليش اللقمة اش هادشي يا ربي درت طيحة الدجاجة على ولادها  طحت وماقالي حد بسم الله عليك خرجت من الصناك محسيت براسي حتى لقيتني حدا باب الحبس  الله يا ربي اش كندير هنا واش جابني هنا بقا العساس كيهضر وكيضحك وانا معارفاه حتى اش كيقول  حتى حسيت بيه جمع الوقفة وصفار وجهه معرفت مالو هادا شفت مورايا وانا نلقاه ويلي ويلي هو الشلال ديال العرق كنحس بيه كيطيح مني  كريم لاباس عليك نطقتها بشق الانفس حسيت براسي طيحت 5 كيلو غا دابا

-لاباس الحمد لله نقدر نعاونك بشي حاجة 

شداتني اللقوة 

-انا حسنا عقلتي عليا 

طلعني وهبطني مزيان بواحد النظرة تحقيرية 

-لا معرفتكش  جاية تزوري شي واحد من السجناء 

تمنيت الارض تتشق وتسرطني اش هاد الموقف حطيت راسي فيه ماجيت نهضر ونقولو باللي انا هي اللي جات البارح مع مدام سامية حتى قال:

انور تكلف نتا بها 

مشا وخلاني واقفة معبرنيش خليت العساس كيهضر ومشيت الدنيا محاساش بها ومعارفاش فين كنحط رجليا  على موقف حطيت فيه راسي منتمناه لعدويا موقف لا احسد عليه شكون هو باش نحط راسي فهاد الموقف عليه كرهت راسي على هادشي اللي درت الله يلعن الحب اللي يحط مولاه فهاد الذل هادا مشيت رجعت البيرو ديالي وانا كنتناجر مع راسي

*عند كريم *

مشيت وخلتها وعلى بالي باللي جايا تتطيحني فشباكها

غريبة هاد حسناء اللي يشوف ليها فعينيها يقسم باللي هادي مكتكدبش البراءة كتقطر ليها من عينيها زوينة بزاف ومكينش اللي يقاومها  اش هادشي كتقول اكريم واش ناوي تستسلم حتى نتا ولا  مستحيل ناري الا بقيت هاكا غينفجر ليا شي راس شي مرة اووف صافي انا عرفت شنو خاصني ندير غادي نسايسها وغادي نمشي على هواها ونحضي راسي منها وديك الساعة نقلب السحر على الساحر ونشد عليها شي حاجة ومنه نستغل هاد الزين اللي مكايتقاومش ...

*عند حسناء*

هديتك قلبي ولكن نتا متستاهلوش  اح شحال قلبو قاسح ومكيحسش  انا من هاد نهار قررت نكرهو  دغيا بغيتو دغيا غنكرهو وعصر السرعة هادا نيت  علاش يا قلبي علاش تطيح من قيمتي علاش داز عندي النهار كحل اسود بلاك نواغ بكل اللغات كنفكر فيه ولكن مللي كنتفكر الموقف الخايب اللي وقعلي معاه كنكره النهار اللي تزاديت فيه لهاد الدنيا اهيا الايام فين تلاو بيك احسنا انا اللي كنت كنقول مستحيل نتذل عند شي واحد واخا غا بشوفة دابا وليتي كتمشي برجليك وكتتهاني عنده كانو كيقولوها ناس الزمان كيقولو راه الحب كيبهدل مولاه دوزت ليلة بيضاء بكل المعاني فينما كانت شي قنت فالبيت ديالي كنشوف فيه السي كريم  كنتفكر الحلمة  لا علاقة بين وجهه البشوش المفعم بالحب فالحلم وبين وجهه الجدي في الواقع حبي مستحيل نسايه احسناء نسايه احسن ليك

صباح يوم جديد مختلف على الامس  وجه عابس بائس  كنحس الجو خايب حيت انا مزاجي خايب الالوان ختافاو من حولي  كيبان ليا غير الاسود مشيت للخدمة داز نهار روتيني خايب  واخيرا وصل وقت الغدا  لا لا مافيا ميتغدا مافيا ماياكل انا خاصني نموت لاش عايشة لاش نهار بغيت نحس ونفتح قلبي فتحته لانسان غلط اش هادشي درت فراسي 

ربعت يدي وحنيت راسي وغرقت فعالم الافكار حتى تحطات قدامي شي حاجة رفعت راسي وكانت المفاجئة اللي متوقعتهاش 

رفعت راسي وشفت اخر شخص كنت نتوقع نشوفو  اه هداك اللي على بالكم كريم جا وجابلي الماكلة  

-ا.ا.ولكن  سي كريم

-ماجيتيش لصناك المعتاد تاكلي وقلت نجيبليك 

-واش انا كنحلم خاصني نفيق اكيد كنحلم 

-بصحتك الغدا

غمزني ودار واحد الابتسامة ساحرة ومشا وخلاني داايبة فحبال الحب واش كنحلم عاود تاني  بقيت كنصرفق وجهي وكنحاول نفيق لا لا اكيد كنحلم واش كاع هادا زهر عندي  زعما يكون فكر فيا وبغاني من البارح لليوم 

داك الماكلة اللي شرا ليا ماخليت فيا حتى فتفوتة راها من حبيب القلب ضروري متكون شهية مللي كملت دخلت فدوامة الافكار عاود تاني  باش عرفني مكليتش وياك قالي البارح معرفتكش كيفاش حتى تفكرني دابا الله يا ربي حماقيت انا حماقيت صافي   ضروري منمشي عندو نشكرو على هادشي  لا ايلا دارلي بحال البارح  عمر داوود مايعاود مغانمشيش يعني مغانمشيش خليه هو يجري مورايا 

وللمرة الثانية وبلا منحس لقيت راسي هاد المرة ماشي حدا باب الحبس وانما حدا باب المكتب ديالو ناري اش كندير هنا ندخل لا مندخلش حتى تفتح الباب لقاني تما كنتناقش غا مع راسي

-حسناء تفضلي دخلي 

ناري عارف حتى سميتي وقالها بلا رسميات 

-ام جيت نشكرك حيت تفكرتيني ونشكرك على الغدا 

-لا شكر على واجب فكرت نعتادر منك على البارح  سمحيلي ولكن كنت معصب ومزروب ومكنتش شايف قدامي 

قلبي تقبط وزدت حماريت ناري كيهتادز وكيهضر بالصواب وبحنان وبهدوء قلبي ويا قلبي غيسطيني هاد السيد 

-شكرا بزاف ومكاين علاياش تعتذر  نخليك غنرجع للبيرو ديالي بالسلامة عليك 

-حسنا

-نعم 

-متبقايش تغيبي  غانكون فالغدا دومان فنفس السناك  يا ريت نتغداو اونصومبل 

كنت شوية وغنفقد الوعي 

-انشاء الله

مشيت وخليت قلبي محطوط عندو

مشيت وانا قلبي طاير طاير بالفرحة كنستنا الغد ليه غا فوقاش يجي  علاش الوقت دغيا كيدوز وانا حداه  علاش الوقت مكايبغيش يدوز مللي كنكون بعيدة عليه 

* *عند كريم *

البنت زوينة وبريئة وكتدخل القلب من نهار الاول  يا خوفي منها  شحال خايف نضعف قدامها ونبغيها  ولكن لا  منضعفش انا ناوي نتغدا بها قبل ماتعشا بها وتوصل حتى لعندي وتتربى   يا حسناء يا حسناء نتي موراك سر كبييير 

* عند حسناء * 

الغد ليه بقيت كنحسب الدقايق يوصل وقت الغدا باش ناكل مع حبيب القلب  وفعلا وصل الوقت المعهود مشيت طايرة لقيتو كيستنى فيا  تغدينا مع بعض احلى ماكلة كليتها 

دوزنا انا وحبيبي 3 شهو خروج وغدا مع بعض  زدت بغيتو وولينا كانهضرو حتى فالتيليفون وليت كنحماق عليه ومقدراش نعيش بلا بيه كريم حب حياتي والرجل اللي تمنيتو واللي كتحلم بيه اي بنت 

كان عليا ضروري نمشي ندير واحد الفوغماسيون فمدينة اخرى  بحال ايلا هزيت جبل فوق ظهري كيفاش غاندير نبعد عليه سيمانة كاملة وانا مكنقدر ندوز حتى نهار بلا بيه مشيت عندو نعلمو بهادشي 

- السلام 

-مالكي اليوما مبدلة عليا فيك شي حاجة

بديت كنبكي 

-وايلي مالكي قوليلي قلقك شي حد غادي نسفو من على وجه الارض 

-لا ماكاين والو من هادشي   غير عندي فوغماسيون وماباغاش نبعد عليك  كريم   انا كنبغيك بزاف ومنقدر نبعد عليك حتى نهار 

-خلعتيني عليك الهبيلة 

عنقني عندو وقالي 

-حتى انا كنبغيك   ماتخافيش غنلقا حل انشاء الله 

-راه الفوغماسيون ضروري منها 

-قلتلك متفكريش فالموضوع انا غانلقا حل 

-كنبغيك بزاف 

-حتى انا 

مشيت وانا طايرة بالفرحة كتقتلني النظرات ديالو اللي مفعمة بالحب كنحس بيه مللي كيكون جالس معايا كيبغي يطير حتى هو ربي يخليه ليا

* عند كريم * 

ناري اش هادشي كندير واش زعما تكون طيحاتني  لا مهما كنت باغيها منستسلمش لوحدة بحالها مستحيل  انا غاناخد كونجي ونمشي معاها للفوغماسيون نشوفو هادشي فين غايوصل 

- يا مساء الانوال على احلى عيون فالدنيا 

- الله الله على حبيبي ولا شاعر 

-على عيونك نولي شاعر وفنان واي حاجة بغيتيها  عندي ليك خبر زوين 

-قولي محتاجة نسمع شي حاجة زوينة من عندك 

- انا خديت كونجي وغانمشي معاك دوزي الفوغماسيون ديالك  مغانخليك حتى لحظة تغيبي عليا 

-اووووو حياتي كنحماق عليك    عنقتو بزاف  كنحماق عليك كنبغيك هادا احلى خبر واحلى مفاجئة  

-هادشي قليل عليك احبيبة وقليل فحقك   كنبغيك 

صبح الصباح لقيت زين ديالي كيستناني بالطموبيل حدا باب الدار مشينا محسيناش بالطريق حتى وصلنا وكان ضروري نجلسو فاوطيل خدينا جوج غرف وحدة ليا وحدة ليه   واخا هاد البعد البسيط ولكن مشتاقة ليه   كنشتاق ليه وهو حدايا   رتاحيت فالغرفة ديالي شوية فالليل سمعت الصوني ديال التيليفون 

-الو حبيبة 

-الو عمري   

-واش نخرجو شوية نتمشاو حدا البحر 

-واخا هاني نازلة 

مشينا تمشينا حدا البحر  الجو فالليل كيكون روعة 

-كريم 

-ام

- كنبغيك 

وقف وبقا كيشوف ليا فعينيا مشحااال   محسيناش براسنا حتى غرقنا فقبلة عميييقة 

-كريم   واعدني عمرك ماتتخلا عليا  واعدني 

-ا  الجو بارد يا الله نرجعو للاوطيل 

دازت 3 ايام   كندوز بالنهار الفوغماسيون وبالليلي كنخرج مع حبيب القلب   على العموم هو ديما معايا

حتى واحد النهار بعدما تعشينا ورجعنا للاوطيل وكل واحد دخل الغرفة ديالو وبما ان الغرفة ديال حبيبي حدا الغرفة ديالي سمعتو كيهضر معا شي حد فالبالكون فالتيليفون وكيعطس قلبي ضرني عليه ومشيت عندو دقيت عليه فتحلي الباب 

-مازال ماجاك النعاس 

-حبيبي يمكن ضرك البرد  نوصيك تغطا مزيان  وشرب شي دوا 

-اجي غطيني نتي احبيبة وشربيني نتي الدوا 

-هههه لا احبي لا منقدرش

مازال مكملت الهضرة ديالي حتى جرني لداخل وسد الباب 

-كريم اش كدير 

-مالي اش درت  حبيبة ديالي وبغيتها تتهلا فيا 

بقينا كنهضرو وضعفنا امام بعضنا وللاسف عطيتو نفسي ، حيت كنبغيه مقدرتش نقوليه لا 

الصباح كان اخر يوم ليا فالفوغماسيون  فقت بين احضان حياتي وعمري  معرفتش هادشي اللي درت واش غندم عليه وشنو مور هادشي  خاصني نقول لكريم نتزوجو فاقرب وقت  يا ربي تسمحلي  يا ربي مشيت دوزت الفوغماسيون ديالي كملتها ورجعت انا وكريم خدينا حوايجنا وشدينا الطريق بالطوموبيل  مشبعني كلمات وشعر  شحال كنبغيك اكريم  

-كريم 

-حياتي 

-خاصنا نتزوجو فاقرب وقت 

-حبيبا تبغي نرتاحو شوية نشربو شي حاجة 

-كريم  متبدلش الموضوع 

-انشاء الله احبيبة 

شديت فيديه وقربتها لوجهي وتنهدت :كريم انا بلا بيك نموت اكريم نموت واعدني عمرك ماتتخلا عليا 

-حبيبة علاش كتهضري بهاد الطريقة  انا الا مخنتينيش نتي مستحيل نفكر نبدلك 

-نخونك ؟ كريم انا مكنشوف حتى واحد فالدنيا من غيرك 

وصلني للدار ودعني الغد ليه رجعنا للخدمة بقينا هكاك فحياة السعادة والافلاطونية  دازت 15 يوم نضت واحد النهار باغا نمشي للخدمة بقيت كنرد وسخفانة  الله يا ربي  يا ربي ميكونش اللي فبالي اش هادشي مكليتش ومشيت للخدمة بقيت كنفكر وكان ضروري منتأكد  انا نعست مع كريم غا مرة وحدة مستحيل نكون دابا حاملة مستحيل مشيت ندير التحليلة وقالولي باللي غاتخرج مور الظهر  كأنهم قالولي ستناي 10 سنين وصلت الوقت المحدد كنت مزروبة نمشي نشوف التحليلة دغيا ما جيت نخرج حتى لقيت كريم 

-فين غادا حبيبة ديالي 

-كريم عندي شي حاجة خاصني نمشي دغيا 

-مالك قوليلي مالك صفرة 

-لا والو منبعد ونهضرو سمحلي مغانتغداش معاك اليوما بالسلامة 

مشات حسنا وخلات كريم موراها 

كريم:شنو مخبيا عليا عاود تاني  بديتي اللعبة ديالك انا غانشوف فين غاتمشي الالة حسنا 

وصلت حسنا للابوراطوار وخدات التحليلة ديالها 

حسنا:مستحيل ،حاملة ،حاملة  الله يا ربي اش غاندير فهاد المصيبة الا عرفت ماما بهادشي غاتسخط عليا خاصني نقولها لكريم  خاصنا نتزوجو قبل مايبان الحمل ديالي  هو كيبغيني ومغايبغيش ليا الضرر غنقولهالو

خرجت من المختبر ولقيت واحد الشخص اللي متوقعتوش كاع كيستنا فالطوموبيل 

-اش كدير هنا نتا

-جيت نشوفك  طلعي فالطوموبيل 

-منطلعش مع شي حد بحالك اسي منير 

-طلعي ولا معمرك تشوفي مزال حبيبك كريم 

غي ذكر سميت كريم حسيت بواحد الضغف رهيب 

-طلعي غا نهضرو مغايوقعليك والو وغانوصلك حتى للبيرو ديالك

طلعت ويا ريتني ماطلعت بقا كيهضر هضرة خاوية وكيحاول يتحرش بيا 

-حيد يدك الكلب  انا اللي حمارة ركبت حداك وتقت فيك 

-كيعجبوك غا يدين السي كريم  ولا كريم حملتي منو كاع 

-بصدمة وكنغوت عليك :نزلني الحمار الكلب نزلني 

-والله لا تهنيتي نتي واياه وغانعاودلو كاع داكشي اللي كان بينا 

-حمار الكداب فوقاش انا شفت فيك اصلا الكداب 

نزلت وانا محاملاش راسي تفو على كلب 

* عند كريم * 

شكون هداك اللي ركبت معاه منير؟ كتلعبي على جوج حبال احسنا  واخا انا غانوريك 

* عند حسنا * 

نزلت وانا كنتأفف وكنعاير حتى لقيت كريم قدامي 

-كريم 

-اه كريم  هادا كريم اللي حصلك نازلة من طوموبيل حبيب القلب 

ماجيت فين نهضر حتى هضر من مورايا الكلب ديال منير 

-حسنا كتبغيني انا اكريم مكتبغيكش نتا والدليل انها اختارت تحمل مني انا  حسنا هازا فكرشها ولدي وجينا نشوفو النتيجة ديال التحليل انا واياها 

كريم حمارو عينيه وعروقو بغاو يخرجو الكلبة كتفلاي علي وحاملة من الفوق 

انا شداتني اللقوة تصدمت بهاد الباطل اللي سمعت مقدرتش حتى ندافع على راسي كيفاش غاندير ندافع على راسي وانا خارجة من طموبيلتو  الكلب مخطط لكلشي وجابها بالسنتيم 

-كريم 

-سكتي قبل مندير فيك يدي سكتي 

مشا وخلاني ومازاد حتى كلمة عمري ما شفت كريم معصب حتى هاد الدرجة كسيرا بجهد وخلاني مصدومة وطايحة الارض وكنبكي الدموع كيطيحو بحال الشلال وكيحرقو فقلبي  واش انا صافي خسرت كلشي  مستحيل  حتى تحطات يد عليا

تلفت لقيتو الكلب ديال منير  حيد يدك الموسخة 

-انا باغيك تكوني ديالي احسنا  كريم راه غي كيلعب بيك وكيدوز بيك الوقت  انا مستعد نعيشك بحال الاميرة 

-كنفضل نموت ونسعى ولا نشوف فكمارتك الكلب 

-اذن غاتسعاي وغاتموتي ومعمرك تحلمي ترجعي عند كريم ولا تعيشي مرتاحة غادوري احسنا وغاتجي راكعة حتى رجليا 

خليتو كيهضر وكيتوعد ومشيت شديت تاكسي

* عند كريم * 

مالك اكريم مالك ياك كنتي عارفها كنتي عارفها كدابا وكتمتل عليك ولا نتا مكنتيش باغي اللعبة تكمل بهاد السرعة ولا مسخيتيش ولا غا كتكدب نتا على راسك اكريم نتا كتبغيها لالا ميمكنش نبغيها انا غا كنمثل عليها كيما كتمتل عليا هي متنكرش اكريم نتا غا تحماق حيت غتبعد عليك مكرهتيش تبقا معاها تشوف ليها فعينيها واخا عارفهم كدابين كتبغيها وكتحماق عليها متنكرش باللي هي الهوا اللي نتا كتتنفس بيه متنكرش انك كتدوب فهواها علاش اقلبي نهار تبغي ، تبغي الشخص الغلط علاش احسنا درتي هاكا علاش كان ممكن نكونو احلا عاشقين نتزوجو ونولدو وليدات وليدات؟ هي حاملة منو ماشي مني انا كان المفروض داك الولد اللي فكرشها يكون مني انا يكون ولدي انا علاش احسنا تلعبي بيا هاكا اش داك يا قلبي لاش تقربت منها كان يصحابلي غنقدر نمتل عليها كيفما متلت عليا هي ولكن مقدرتش علاش علاش سمعت صداع برا ودخلت حسنا 

-كريم سمعني عفاك منير غير كيضحك عليك انا معمري شفت فيه حتى شوفة انا حاملة منك نتا 

-جايا تكملي الفيلم ديالك هنا خرجي برا متسرطاطش ليك اني كشفتك انا شحال حذروني منك كنت عايق بيك من الاول السافلة ولكن قولي لحبيب القلب ديالك بلا مايفرح بزاف حيت خداك راه خدا غي الشايط عليا حتى لعبت بيك مزيان وعطيتك ليه سيري عندو كيعجبك تلعبي على كل الحبال دابا يبانليك شي واحد حسن مني تمثلي عليه 

-عفاك اكريم راه الولد اللي فكرشي ولدك والله حتى ولدك نتا يالله نمشيو نديرو التحليل تتأكد 

-مغاندير لا تحليل لا والو وخرجي بحالك واش حتى مرضاش بيك منير جيتي تلسقيه فيا انا سيري 

-كريم تيق بيا شوف فيا فعينيا انا مكنكدبش عفاك اكريم راه مكاين والو من داكشي اللي سمعتي منير كيكدب عليك انا عمري عرفت شي راجل من غيرك نتا تيق بيا 

-خرجي 

شدني كريم بالجهد وجرني لاحني برا بلا رحمة بلا شفقة كلشي الموظفين بقاو كيشوفو فيا وانا بقيت مليوحة فالارض وكنبكي الدم بدل الدموع كنبكي بحرقة كبيرة قلبي كيتقطع كريم متيقنيش مستحيل مشيت كنجر فرجليا معارفاش فين كنحطها طوموبيلات كيكلاكسونيو عليا وانا ربي اللي عالم بيا مرانيش فهاد العالم اش غاندير فهاد الولد اللي فكرشي وشنو نقول لماما وشنو نقول للناس وولدي مللي غايتزاد شنو نقولو واش نقولو باباك معترفش بيك ومابغاكش اش هادشي درت فراسي مكانش عليا نستسلم ليه فلحظة ضعف غنتفضح ومغانولي ساوية والو فهاد المجتمع كلشي غايحتقرني وغينعتني باسوء الصفات غانمشي من هاد المدينة نولد ولدي وربيه ونعيشو بعادين على هاد الناس وماما لمن غنخليها الله يا ربي عقلي غاينفجر انا اللي درتها لراسي انا منير منير هو السبب فهادشي هو اللي خاص يقول الحقيقة لكريم خاصو يقولو الحقيقة انا غانمشي عندو نرغبو يقول الحقيقة انا غنموت بلا كريم غنموت لا كريم خاصو يتيقني خديت التيليفون وصونيت لكريم المرة الاولى مجاوبش المرة التانية غوت عليا 

-شنو بغيتي تاني ياك قولتلك بعدي عليا الكلبة 

-كريم انا الى بعدتي عليا غنموت اقسم لك اني كنقول الحقيقة غنموت اكريم كنترجاك تيقني كنترجاك تيق بيا 

-غاتعطيني بالتيساع ولا غنوريك الوجه الخايب ديالي 

-كريم انا غانموت بلا بيك تيق بيا كريم كريم الو علاش قطعتي كريييييييم 

لحت التيليفون الارض ومكان بيدي الا نمشي نرغب فمنير وكنت عوالة الا مبغاش يقول الحقيقة لكريم اني ننتاحر ايه ننتاحر حيت مابقا عندي حل اخور من غير اني نموت نريح ونرتاح نموتو انا وولدي بجوج حيت معنديش الوجه اللي نقابل بيه الوالدة ديالي والناس مشيت عند اللي ميتسماش للدار كأخر محاولة ليا نعتق العلاقة بيني وبين كريم او بالاحرى نعتق حياتي اللي ناوية ننهيها الا مفلحتش فاني نقنع هاد الجبان 

-مرحبا بالسنيورة هضرتي خرجت قلتلك الزوينة راكي غاتجي راكعة حتى تحت رجلي 

-انا فعلا جايا نركع ولكن ماشي باش نرغبك تتزوجني انا جاية نرغبك تقول الحقيقة لكريم تقولو باللي انا مخنتوش معاك وباللي انا بريئة وباللي هادا اللي فكرشي ولدو هو 

-هاهاهاهاها كتحلمي الزويونة ديالي 

-منير عفاك واش مكاتخافش الله راه هادشي اللي كادير فيه حرام 

-حرام وماشي حرام عليك تضيعيلي خدمتينتي راكي مازال مشفتي والو مني 

-شنو غادير كتر من هادشي اللي درتي نتا راك دمرتي ليا حياتي شنو غادير ليا غتقتلني متخافش انا غنهنيك من هادشي حيت انا غنقتل راسي وماغنقدر نعيش حتى ثانية وانا بعيدة على حب حياتي رتاح امنير رتاح نتا راك نجحتي وانتقمتي مني مزيان 

-فين غادية احبيبة 

-طلق مني ماسوقكش فيا طلق 

-علاه دخول الحمام بحال خروجو 

-طلق مني الكلب شنو بغيتي مني مزال 

-بغيتك نتي بغيتك ليا مللي ناخدك ديك الساعة ها الزنقة وقتلي راسك بغيت حقي فيك 

شدني الكلب وحبسني فواحد البيت وانا كنغوت 

-غا غوتي احبيبة حتى واحد مغايعتقك من اليوم نتي ديالي ديالي

* عند كريم * 

اه يا قلبي اش هادشي يا ريت نكون غير ظالمك احسناء يا ريت قلبي كيتقطع عليك علاش درتي هاكا لاش مال حسها تقطع مابقاتش جات حتى خدمتها ممشاتش اكيد مشات تحتافل هي وحبيب القلب بمناسبة الحمل اكيد وانا جالس كنتشوا هنايا وكنموت اكيد تكون دابا فرحانة وانا قاتلاني مشيتي وخديتي قلبي معاك احسناء 

* عند حسناء * 

دخل عندي منير للبيت بعدما شبعت غوات وبكا حتى حسيت القوة ديالي مشات دخل عندي بغا يغتصبني ولكن انا بقيت كنضرب فيه وكنقاومو وانتقل لمرحلة الضرب بقا كيضرب فيا حتى حسيت بالنفس ديالي ضياق وكنحس راسي غنفقد الوعي ديالي اما منير مكفاهش الضرب اللي ضربني كمل حتى على الاغتصاب اغتصبني بوحشية حتى فقدت الوعي تماما حليت عينيا على ضوء خفيف وصوت الممرضات انا فالمستشفى كيفاش حتى وصلت الهنا 

-فاقت المريضة غانمشي نعيط للطبيب 

بقيت كنفتح عينيا بزز وكنحس بالجسم ديالي تقيل وكيعطيني الحريق جا الطبيب كيفحصني 

-على سلامتك انسة حسناء البوليس كاينين برا وبغاو يعرفو شنو وقع بالضبط 

-كيفاش حتا جيت هنا ادكتور وشكون جابني وشحال وانا هنا 

-يوماين ونتي مغيبة ،لقاوك الناس مليوحة فالطريق شي حد تكرفس عليك وللاسف فقدتي حتى الجنين واش الاب دالجنين هو اللي تكرفس عليك هاكا ؟

بديت كنبكي حتى دخلو عليا جوج رجال باينة فيهم من البوليس 

-انسة حسنا شكون تكرفس عليك 

-منير حازم 

-واش متأكدة من هادشي الاي كتقولي هاد الكلام راه خطير 

-اه متأكدة 

مللي كملت الاستجواب مع البوليس دخلت عندي ماما شافت فيا واحد الشوفة مليئة بخيبة الامل تمنيت نموت على انه تشوف فيا الام ديالي هكاك او انها تعرف شي حاجة من داكشي اللي وقعلي 

-ماما 

-سكتي متهضريش دابا ارتاحي 

-ماما عفاك متعاملينيش هكا عارفة راسي غلطت ولكن تعلمت من الغلط ديالي عفاك سمحيلي نبوس يدك اماما 

-سكتي قلت ليك سكتي ضيعت شبابي وحياتي باش نربيك ونقريك فالاخر هادشي باش جازيتيني مشوهاني مضيعة راسك ومضيعاني الله ياخد فيك الحق كيما شمتي فيا العديان 

-ماما ضربيني عاقبيني ولكن الله يخليك ماتخلينيش انا نستاهل كلشي حيت فرطت فراسي ومتدرتش بنصايحك 

-متبكيش سكتي وسدي فمك سكتي متفضحيناش كتر ما حنا مفضوحين شنو قلتي للبوليس ؟

-قلتلم اللي كاين 

-علاش الهبيلة كون خليتيني نتفاهم مع داك الويل ونقنعو يتزوجك باش نسترو هاد الفضيحة 

-مستحيل اماما مستحيل عفاك مديريش هكاك ومتحكميش عليا بالموت انا ميمكنش نتزوج داك الكلب الحيوان 

-سكتي مازال زايدة فيهم نهار حملتي معاه كان عاجبك ودابا كتقولي عليه حيوان 

-ولكن شكون قالك هاد الهضرة 

-داك السيد اللي سميتو كريم عاودلي كلشي جا يزورك وعاودلي اللي كاين 

-كريم كريم معارف والو مستحيل 

-انا غنمشي نرغبو يتزوجك منبغيش نسمع حسك 

-الله يا ربي اش هاد الوحلة راني فيها كريم خاصني نهضر مع كريم 

صونيت ليه رغبتو يجي عندي نهضرو فعلا جا ويا ريتو ماجا 

-كريم ماما بغات تجوجني بمنير انا نموت ومنشوفش فكمارتو 

-مشيتي معاه بخاطرك احسنا وغدرتيني دابا مازايدا فيهم 

-كريم كنرغبك نبوس رجليك متخلينيش ليه نعيش خدامة تحت رجليك دير فيا مبغيتي غا متخلينيش ليه 

-شفتي طريق الغلط فين كيوصل احسنا وليتي كتذلي راسك 

خرج وخلاني كنبكي وكنندب وكنضرب فراسي وصلت لواحد المرحلة اللي منقدرش نتحكم فيا فنفسي كرهت راسي كرهت كلشي كرهت العالم تمنيت لو اني متولدتش كاع

جاني انهيار بقوة البكا جاو الممرضات دارولي ابرة مخدرة محسيتش براسي حتى نعست 

حسيت بشي حد كيمسح على شعري فتحت عينيا لقيت مدام سامية دمعو عينيا مللي شفتها مكرهتش تكون ماما هي اللي فوق راسي 

-سكتي ابنتي باراكا عليك من البكا متفقسيش راسك هادا قدر ومكتوب عليك 

-واش بغيتي نتزوج داك الحيوان انا نموت ومنشوفش كمارته مرة اخرى 

-لا متزوجيهش واياك تديريها 

-شنو فيدي مندير ماما مبغاتش تقتنع 

-نتي مبقيتيش صغيرة وفيدك شواهد عليا تقدر تعيشك كيف بغيتي 

-شنو ندير

-خرجي من هاد المدينة كاع وقلبي على شي خدمة فشي شركة بشي صالير زوين وانا نشوفلك شي بنات تسكني معاهم على ما توقفي على رجليك وتقدري تسكني بوحدك عيشي حياتك لراسك وحتى واحد ممنحقو يتدخل فيك 

-وماما

-ماماك غادي ترجع لطريق الصواب مللي غادي تغيبي عليها مكاينش شي ام اللي تقدر تبعد على ولادها وانا غانمون معاها ديماالى حتاجت شي حاجة غالقاني انا اهم شيء تبعدي دابا حتى يبردو الاوضاع مللي جات ماما عندي اوهمتها باني موافقة على زواج من داك الجلاخة خرجت من المستشفى ومشيت لدارنا جمعت الديبلومات ديالي وكاع الشواهد اللي غنحتاج جمعت صاكي خليت ماما ناعسة بالليل وخرجت ماشفتش مورايا خليت امي داري اللي كبرت فيها حب حياتي دمعت واختاريت نحاول ننسى الحب هو اللي وصلني لكاع هادشي حلمت وماكانش خاصني نحلم خاصني نفيق ونعيش الواقع كينتظرني مسار صعيب بعيد على كل هاد الناس قررت نبدا صفحة جديدة نعيش فيها لراسي نعيش كيما بغيت انا ماشي كيما بغاو هما شديت الكار 

وسافرت وخليت كلشي 

الصباح ماخلات ماما فين قلبات وعيات بالتقلاب

يتبع...

---------------------------

القصة الكاملة متوفرة بتطبيق قصص مغربية بالدارجة

ادعوكم الى اكتشاف المزيد من القصص في تطبيق قصص مغربية بالدارجة : قصص معبرة من الواقع المعاش، قصص مسلية، رومنسية، حزينة و مؤلمة، بعضها من نسج الخيال و البعض الآخر من قصص واقعية و حقيقية.

https://goo.gl/XEC5HH